Sumstaðar er svona óþekktarlist falin í borginni. Til dæmis tók sig einhver til og bjó til veggflísar með myndum af karakterum úr tölvuleiknum space invaders og faldi þær hér og þar í borginni. Ég er búin að finna þrjár hingað til. Leitin heldur áfram.

Um daginn fór ég á ströndina, valdi þá fámennustu til að sóla mig á og viti menn, það var nektarströnd.  Þar var fullt af gömlum mönnum með vel tönuð typpi. Á meðan ég var að líta í kringum mig ákváðu tveir þeirra að stunda einhverskonar líkamsrækt sem fólst í því að baða út öllum öngum (Öllum!) og sveifla líkamanum til hægri og vinstri til skiptis svo djásnin slógust til og frá. Íhugaði að taka myndband. Hætti svo við.

Hér borða allir kvöldmat klukkan 10 eða 11 á kvöldin, það verður erfitt að snúa þessum rythma við þegar ég fer í skólann eftir viku.

Í gær fór ég í pípuklúbb Barcelona. Þar er ómögulegt að komast inn ef maður þekkir ekki einhvern vel tengdan innfæddan. Klúbburinn er á þriðju hæð við torg fullt af túristaveitingastöðum og minjagripaverslunum. Maður dinglar bjöllu á ómerktri hurð og bíður eftir að vera hleypt inn, áður fyrr þurfti lykilorð. Klúbburinn er gríðarstór og reykfylltur og ég var svo heppin að þegar ég kom var swingband að byrja að spila. Þeir voru argentínskri, með einum serba. Aðalgítarleikarinn var með síðar svartar krullur, langa kóngulóarfingur og sígarettu í munnvikinu sem hann saug eins og enginn væri morgundagurinn. Hann var svo upptekinn af spilamennskunni að askan hrundi af yfir gítarinn og hann tók ekki eftir því fyrr en hann var byrjaður að reykja filterinn, en þá spýtti hann sígarettunni út úr sér án þess að missa úr takti svo hún lenti glóandi á gólfinu fyrir neðan sviðið, rétt við fætur áhorfenda.

Ég elska Barcelona.

Tveggja mánaða sumarfrí er nú full gróft, ég er eiginlega að vonast til að hafa fallið á seinasta prófi svo ég hafi eitthvað að gera…

Ég vaknaði snemma í morgun til að fara frítt í sund í háskólanum. Sundlaugin var mjög köld svo ég fór bara í gufubað í staðinn. Í skólanum fengum við að kíkja inn í seinustu líkin og fundum meðal annars lungnakrabbamein, nýrnasteina á stærð við tíkall, græna gallblöðru og pínulitla þind. Svo fékk einn tutorinn líka að prófa nýju beinasögina og saga eina höfuðkúpu í sundur. Það var mjög gaman.

Eftir skóla ætlaði ég að vera rosalega mikið dugleg að læra og var nýsest niður þegar vinkona mín sendi mér skilaboð um að hún væri tilbúin með slackline í almenningsgarði hér rétt hjá. Svo ég dreif mig á hjólið og lærði að ganga á línu. Ég náði 3,5 skrefum þegar best lét og kom heim blá, marin, grútskítug og sæl. Ekki einusinni hitaskúrinn sem ég lenti í á leiðinni var mér til ama.

Svo er ég líka búin að kaupa frisbídisk og badmintonspaða. Vegna þess að ég er að læra fyrir próf. Og vegna þess að sólin bara skín og skín og skín og ég held að lífið gæti varla verið betra.

Lyktin í krufningaherberginu var töluvert verri í dag en í gær, og ég komst að því mér til mikillar skelfingar að það er gat á hægra stígvélinu mínu. Einnig, er að íhuga að gerast grænmetisæta þar til vikan er á enda.

Annars verða Íslendingar sennilega glaðir að heyra að hér rignir allan daginn.

Í kvöld fór ég á fyrirlestur um skurð- og fæðingarlækningar. Í pásunni notaði ég svo tækifærið og tók á móti einum fyrirbura sem sat fastur í fæðingadúkkunni og svo fékk ég prófa að skera nokkrar blöðrur úr móðurlífi með hátæknilegum töngum, minimyndavél og fjarstýrðu dóti.

Ég er að velta því fyrir mér hvað venjulegt fólk eiginlega gerir í frítíma sínum…

Í kjallaranum var margt forvitnilegt að sjá, meðal annars fjöldinn allur af kössum og beinagrindum og ein líkkista merkt danskri konu fæddri í kringum 1930. Á kistunni stóð meðal annars nafn og heimilisfang.

Við máttum velja um hvort við vildum fá plastbein eða alvöru bein nema ef maður vildi heldur fá plastbein þá var maður tekinn afsíðis og þjarmað hressilega að manni þangað til maður samþykkti að taka alvöru bein. Það kom ekki fyrir mig því ég ákvað strax að fá alvöru!

Beinin sem ég fékk er rúmlega hálf beinagrind sem er orðin vel slitin og notuð. Ég ákvað strax að þetta væri tékkneskur maður sem héti Pavel. Um leið og ég fékk Pavel ákvað ég að fara með hann heim og raða honum saman á gólfinu. Pavel er bara með hægri útlimi og hægra sett af rifbeinum.

Ég komst líka að því að Pavel er mjög sennilega kona því hann var bara örlítið hærri en ég. Nema Pavel sé frá 17. öldinni, þá hefur hann bara verið temmilega hávaxinn karlmaður.

Mér þykir vænt um Pavel. Ég skoða hann oft. Svo passa ég að læsa kassanum vel og vandlega á næturna svo ekkert sleppi nú út…

kæru samnemendur med litningana XY, synid nu tillitssemi og setjid klosettsetuna nidur fyrir kvenfolkid

Undir er buid ad krota:

Tad er ekki sjalfur Y litningurinn heldur einungis SRY genid sem veldur einkennum karlkynsins.

Aha… takk fyrir leidrettinguna :p Stundum er erfitt ad umgangast bara svona gafad folk…

Nokkur dæmi á muninum á IndóSöru og Dönsku/ÍslenskuSöru:

• IndóSara drekkur te, ekki kaffi
• IndóSara notar chilisósu á franskarnar, ekki tómatsósu
• IndóSöru finnst franskar ekkert spes, hrísgrjón eru betri
• Salmonella er lífsstíll, ekki sjúkdómur
• Þegar IndóSara fer að versla eyðir hún í mesta lagi 1000 krónum, og finnst það mikið
• IndóSara fer í moskuna og svo á munaðarleysingjaheimili með núðlur og ávexti, DanskaSara fer í mollið og svo á pizzastað og fær sér hamborgara
• IndóSara stendur sig ekkert alltof vel í skólanum, en guð minn góður hún er streetsmart!
• DanskaSara æfir fimleika, IndóSara æfir tennis
• DanskaSara hjólar í skólann á morgnana, IndóSöru er ekið þangað af einkabílstjóra fjölskyldunnar
• Ef DanskaSara nennir ekki að elda sér kjúkling endar hún á því að borða bara hafragraut, IndóSara eldar ekki, hún pantar bara mat hjá vinnukonunum
• IndóSara borðar mat beint af trjánum. Það gerir DanskaSara líka. ÍslenskaSara hefur smakkað barrnálar en fannst þær ekkert spes
• DanskaSara gengur í stígvélum og IndóSara í sandölum
• DanskaSara fer í frí til Árhús eða Íslands, IndóSara fer í frí til Bali
• IndóSara er hlynnt skírlífi fram að hjónabandi, DanskaSara… tja…
• DanskaSara býr í 12 fermetra herbergi með fátækum rúmenskum vefsíðuhönnuði, IndóSara býr í risastórri höll með sex manna fjölskyldu, 5 manna þjónustuliði, 3 kennurum og 30 drengjum á heimavist
• DanskaSara ætlar að verða læknir, IndóSara hafði ekki hugmynd um hvað hún ætlaði að gera við líf sitt

”Þú ert með falleg gleraugu, þau fara þér vel. Og góðar tennur! Þú ættir að giftast milljónamæringi, mundu það, og ekki fara lægra! Falleg gleraugu og góðar tennur!,,

Og hananú! Sjálfboðaliðar?

Í dag fékk ég símtal sem var skrítnara en nokkuð annað sem ég hef fengið. Það hljómaði einhvern veginn svona:

(Sit á lesstofunni þegar titringur frá síma byrjar að enduróma um allan salinn. Eftir nokkra stund og fjölmörg reiðiblik frá einbeittum námsmönnum fatta ég að þetta er síminn minn. Hleyp út)

Sara: Halló?

Maður: Já hæ! Þetta er ég. Heyrðu það var verið að láta mig lausan.

Sara: Ha?

Maður: Já, sko þú vissir af því var það ekki? Það var verið að sleppa mér, geturu sótt mig?

Sara: Ha? Sleppa þér? Hvað ertu að tala um?

Maður: (hissa) Nú úr fangelsi! Þú vissir að ég hefði verið í fangelsi!

Sara: Uhm… vitlaust númer…

Maður: (Hlær hátt) Nú jæja, afsakaðu það, bless bless!

Voooó! Pælið í því að vera nýsloppinn úr fangelsi og hringja í vitlaust númer, talking about bad luck sko!